Bertsolari txapelketaren ondorenak
Izazpik
1
Bertsolarien txapelketa hau
Euskaltzaindiak jarria,
baina babes eskeintzearren
hor agertu da herria,
arretaz eta erne jarririk
jendetza pogarria.
Ta joan ginen denok nabaitu
gendun zerbait pozgarria,
bertsolaritzan sortu zaigula
beste molde bat berria.
2
Garai batean bertsolaritza
tabernetan zen ekarri,
baina gerora antzerki eta
plazara zuten ekarri.
Lan hontan aski saia zirenak
Uztapide ta Basarri.
Ta oraingoak haize berri bat
dakarkigula igarri,
ikastetxe ta goi-mallarako
bidean digute jarri.
3
Zerbait berria sentitu zuen
gure bihotzaren suak,
hor entzundako bertso ederrak
ez ziraden berdintsuak.
Sakontasunez harrigarriak
ta pentsakeraz osuak,
esanahiez bete-beteak
gainera doinu gozuak,
molde hontako pitxiak ziren
Amuritzaren bertsuak.
4
Ene Xabier, hire bertsuak
hautsi zigutek hezia,
mintzaira gozo, pixuz betea,
hura bertso-eresia!
Hitz bakoitzean zeramakiten
sakontasun berezia,
ezagun zien ez hengoela
arinkeritan hezia,
txapela ere eraman huan
eta ondo merezia.
5
Beste hamasei partaidieri
nere esker zorionak,
aspaldi hontan urduri eta
gau asko esnai egonak
igarotako estu-aldiak
ez ziren izango bromak,
jendeak zion: «hauek ez ditut
bertsotan bakarrik onak,
baizik joku bat irabazi ta
galtzen dakiten gizonak».
6
Maila hortara ez dira beti
nahi dutenak iritxi,
asko usteta gero erdia
ezin inun erakutsi.
Gaur zuen bidez bertsolaritzak
ez du irabazi gutxi,
egun gaiztoak igaro behar
nahi badiogu eutsi,
saiatu gabe bertantxe hiltzen
ezingo diogu utzi.
7
Bertsolaritzak ez du merezi
alde batera uzterik,
ez ote dago ume ttikiei
eskolan erakusterik...?
Guk badakigu berez ez bada
ez daukala ikasterik,
baina akaso piztu liteke
hasiez gero gazterik,
ikastetxetan erakustea
ez nuke nahi besterik.
8
Gure hizkuntza hartu gendunok
bularretikan eranez,
bertsolaritza maiteko degu
nik pentsatutzen dedanez.
Baina laguntza ez da egiten
mingainarekin esanez,
baizik jalaldi ta saioetan
entzule sutsu izanez,
hola debiltzen bertsolarlei
babes gozoa emanez.