Amodio ukatua

Izazpi

 1

 Bolkan zulotik sua dario

 odeietatik trumoi otsa,

 egun argiak gaua ondoren

 ta sortzeak eriotza.

 Berezko gauza guziak dute

 jatorriaren abotsa,

 zeren oiartzun ote dirade

 maitasuna ta biotza?

 2

 Betidanitik gure barneko

 lur sakonean jarria,

 andre gizonok sentitzen degun

 amodio egarria.

 Gure gorputza loratutzean

 mirariaz igarria,

 adimenaren sena delarik

 biotzari ezarria.

 3

 Izaki denak berekin dute

 lege orren aztarrana,

 eta gizonok orrez gaiñera

 kontzientziak esana.

 Nola sortu ta zer nabaitzen

 arrigarrizkoa dana,

 gure gaiñetik dagon Norbaitek

 zuzen egindako lana.

 4

 Jangoikoaren maitasun legez

 loturik gaude guziak,

 baiñan olako gauzak aitatzen

 lotsaturik ikusiak.

 Gizonarentzat zergatik dira

 zikin eta itxusiak,

 berez garbi ta txukun sortuak

 munduaren nagusiak...?

 5

 Pakean utzi ditzagun emen

 garbiak diranak berez,

 amodiozko artu-emanak

 lotuta dauzkagu legez.

 Alkar ikusi ezin diranak

 uztarrituaz paperez,

 maitasuna da mugaz beterik

 ta gorrotoa baterez.

 6

 Lege oietan errendituaz

 zintzo asko nebillean,

 txikitandikan ikasitako

 bizitzaren karrillean.

 Baiña biotza sentitzen nuen

 gaixorik erdi illean,

 zenbait negar ta zenbait tristura

 nere kolko ixillean !!!

 7

 Neurri estuan zaindu eziñik

 zenbat aldiz nekatua,

 amodioa neretzat baizen

 igali debekatua.

 Baiña geronik sentimentu bat

 daukat gogor finkatua,

 maitatutzea ez litekela

 izan iñoiz pekatua.

 8

 Begietara sua datorkit

 erraietatikan goruntz,

 nere barnean sentitutzen det

 ez dakit zenbat aldakuntz.

 Sorginkerizko mandatarien

 albistea dator onuntz,

 aingeru baten billa nabilkit

 nere anima ta gorputz.

 9

 Zeru erditik ixuritako

 aragizko aingerua,

 ezagun egin nintzanetikan

 naukazu erdi erua.

 Zeiñek itzali liteke orain

 barruko txingar berua?

 Mundutarrentzat zerurik bada

 zu zera nere zerua.

 10

 Espirituak ezin mendera

 aragiaren indarrik,

 iñoiz probatu duenik bada

 ez dauka esan bearrik.

 Ene anaiok, zer tristea dan,

 sufritutzea bakarrik!

 Gau eta egun etzait faltz

 Gau eta egun etzait faltatzen

 begi bietan negarrik.

 11

 Anai gaixoak irten orduko

 itxasora nai du sartu,

 berez dituen arnas bideak

 ortara dute biartu.

 Anai antzera, nere animak

 zureaz nai du elkartu,

 ene maitea, zutaz kanpora

 ezin det arnasik artu!!!

 12

 Nere desgrazi paregabea

 neretzako etzerala.

 baiñan jakiñik,legeak autsiz,

 elkarrentzako gerala.

 Kontzientzia beti esanaz

 ori pekatua dala,

 zorigaiztoko nere pausoak

 infernurako dirala.

 13

 Sekretu orren pixu astuna

 jaso eziñik nekarren,

 bide okerrak azkenerako

 damutasuna zekarren.

 jaunarengana altxa dezadan

 biotza al dan azkarren,

 pekaturikan baldin badaukat

 barkatu zaidazu arren!!!

 14

 Bekaizkeri ta lege gaiztoaz

 beterikan ingurua,

 gure biotzak atsedentzeko

 nai du leku segurua.

 Pekatariok, zeru aldakuntz

 jaso dezagun burua,

 antxen dauka azkengabeko

 maitasun iturburua.

 Agur "Bilintx"

 Zure omenez, mendak bezala,

 usaintsua izan banintz,

 zure bertsoak amodioa

 nola gau-oskarbiak intz.

 Euskalerrian gizonik bada

 maitasunezko itzez mintz,

 Indalexio Bizkarrondo un

 eta izengoitiz "Bilintx"