Sortatxoak bertsotan

Basarri

 Aide batetik baratza dala

 bestetik berriz soroa,

 unuzkaldeko sagastia ta

 arutzko zelai ondoa:

 denok eskale biurtu gera

 errukitu da goikoa

 euri exkaxiz bagiñan ere

 biali digu naikoa.

  ¡GORA ZUEK!

 Jel Alderdiko gudari zarrak

 bilduak dira batean

 lengo nekeak gogoratzera

 denak alkarren artean

 egun aundia, egun gozoa

 zuten joan dan igandean

 alkar maitego izaten baita

 urteak iges joatean.

 Lengo gertari zar guztietzaz

 itzegiten du "Ereintza"-k

 zuen espetxeratze ura

 or agertzen du "Kizkitza"-k

 urtero batu bear dezute

 asmoa artu bakoitzak

 bazkari on bat merezi bait-du

 aiñ legezko dan oroitzak.

 Oraintxe ogei ta bost bat urte

 zuek espetxeraturik,

 lapur batzuen tankeran antxe

 ezer erru gabetandik

 orduan ere abertzale ta

 gaur gogorrago oraindik

 espetxe beltzak eta zigorrak

 ezpaitu aldatzen gogairik.

 Kantabriako itxas exkiñak

 ederrak dira bai guziz,

 negu luzean aztu eziñik

 egon oi diranak aunitz

 ederragoak izango ziran

 bikañagoak milla aldiz

 ustelkeri ta lizunkeri au

 egundo sartu ezpalitz.

 Jazkera narratz, ibillera txar

 pekatuari lotuak,

 aintzakotzat artu nai ezik

 eleiz jaunen aginduak;

 abere gixa jarri ditugu

 oraintxe geure buruak

 oraiñ panparroi gabiltza baño

 ondoren datoz kontuak.