Jo aintzina!

Duny-Petre, Pierre (Manech, Manex)

 1

 Iholdiko eliza ontsa berritia,

 Lehen bezain eder du bere aurpegia.

 Hari beha bainintzan, arrunt harritia,

 Irriz ari zen naski, nitaz trufatia...

 Beraz gora Iholdi, ta Ostibarria!

 2

 Eliza, jauregia, maldaren gainetik,

 Etxe zahar ederrak plazaren aldetik,

 Pentzez eta baratzez hek inguraturik,

 Oi, zer lili buketa, oraino bizirik!

 Ez da, Pe-Nafarroan, hain pollitagorik.

 3

 Ba, bainan gibeletik, malda sahetsian,

 Jauregi gaixo hura zagon ahalgian,

 Elizaren ondoan, iduriz ikaran,

 Dorreak arraildiak leihoak haizian...

 Elizalarrekoek zer dute gogoan?

 4

 Araiz, Iholdiarrak dira axolatzen

 Jauregi ttipi hortaz, ikusiz nola den.

 Artatuko dutea, gainetik bederen,

 Berrituz teilatia, xaz ez bada aurten?

 Zerbait egin behar da, hor lehen bai lehen.

 5

 Zaindu behar litake Plazaren itxura,

 Josirik elizari jauregi xaharra,

 Leku pollit horrekin, laket estranjerra,

 Herriaren arima hor baita segurra...

 Hots, Meria batentzat, zer toki ederra!

 6

 Hortan, lauda ditzagun gure arbasoak,

 Eta gure lehengo ofizialiak,

 Harri-pikatzailiak, harginak, zurginak,

 Apaindu baitzituzten herri zaharrenak,

 Amultsuki moldatuz bere lan guziak!

 7

 Moldatu baitzituzten. mendi bazterrian.

 Etxe xuri xabalak, lau haitzen erdian,

 Zubi-bizkar gogorrak, osinen gainian,

 Gaztelu-etxe gaitzak, bortuko bidian,

 Hil-harri biribilak, elizen aldian!

 8

 Kaskoinkerri zozoak zuhurki baztertuz,

 Etxe zahar ederrak barnetik berrituz,

 Bainan eskualdunki kanpotik apainduz,

 Gauden herritar beti, duguna maitatuz,

 Ohidura zaharrak ontsa begiratuz!