Agurtzen ditut Labaien jauna

Azpillaga

 Agurtzen ditut Labaien jauna

 eta Imanol Murua,

 Pasai San Pedro, Berriatua,

 Mutriku ta Ondarrua,

 agurtutzen det Astoria hontan

 bildu dan jende mordua,

 saria ekartzen heldu diranak

 berdin agurtzera nua,

 ta bertsolari lagun haueri

 agur ta esker berua.

 Egia da bai Herri zar hontan

 kantu asko det emana,

 baina negurriz gorakoa zen

 bertsolarien esana,

 hainbat senide hainbeste lagun

 bildu zaizkit neregana.

 Badakizute bana-banaka

 agurtzerik ez dedana,

 denok batera hartu zazute

 besarkada haundi bana.

 Bertsolarien bizimoduan

 dira poza eta penak,

 etxetik irten eta herririk herri

 ibiliak gera denak,

 baina gehiago sufritutzen du

 sukaldean zai daudenak,

 bertsolarien emaztegia

 nere eta bestenak,

 zuek zerate txalo guztiak

 merezi dituzutenak.

 Ta Lopategi lagun zaharra ere

 aitatzea komeni zan,

 garai batean uztarri baten

 berakin ibili nintzan,

 polizi eta guardizibilak

 gure atzetik zebiltzan,

 bertsoa gendun gure armatzat

 gerra edo gudaritzan,

 poz bat badaukat egin genduna

 ez zala alperrik izan.

 Zuzendaritzat hartu dezagun

 Gernikan dago haritza,

 zazpi anaiak goza dezaten

 egiten duen geriza.

 Bertsolariak herririk herri

 predikatutzen gabiltza,

 menderik mende bizi dedila.

 gure arbasoen hitza,

 eskerrik asko t'agur danori

 ta gora bertsolaritza.