¡Maite!
Arzac, Antonio
Errechiñol zaudena
Sasian kantari
¿Zer esaten dizkatzu
Zure kabiari?
Maitasuna dario
Maiatzak ugari,
Sortitz osoak dio
¡Agur Mariari!
Lurra loak artu du,
Dena dago isill,
Zure lagunak daude
Arboletan bill-bill,
Arrats aize biguñak
Osto bat ez dabill,
Badiruri munduan
Guztia dala ill!
An dator Illargia
Gauba edertzera,
Ta loreak dijoaz
Amets egitera;
Izarrak aitorturik,
Zuri aditzera,
Aingeruak Zerutik
Dirala atera!
Ordu au aukeratzen
Dezu minzatzeko,
Ta da, iduritzen zait,
Neri esateko
Emen beko gauzetaz
Oso aztutzeko
Amorioa zer dan
Nigan sentitzeko!
¡O nere mandatari
Konsolagarria,
Maitatzeko jaioa
Zeraden choria!
Ni ere ala nazu
Onat etorria,
¡Amaika malkorekiñ
Amachok azia!
Esan: ¿nork eman dizu
Dezun eztarria?
Zure musika orrek
¿Non du, non, sortzia?
¿Zer da zuk arriturik
Gizona uztia?
¡O!... ¡zeñ aundia zeran
Izanik chikia!
¡O nola dan baneki
Nik zure mintzoa,
Otsezti miragarri
Paregabekoa!
Baña, choragarriro,
Zuk esantakoa...
Nere animarentzat
Da misterioa!
Agur, bada, choria
Segi ¡bai! kantari,
Beregan pensatzera
Deitzen gizonari;
¡Belauniko jartzen naiz
Ni Egilleari,
Kanta guztien kanta
Da ¡otoitz Jaunari!
|