Bi langille lagunak

Artola, Ramon

 Bat izanik zapata

 zar konpontzallea,

 zan oso kontuzkoa

 eta langillea;

 bere laguna berriz

 santu egillea,

 azkarra bañan ez chit

 fortunagillea.

 Onek zekielarik

 errez irabazten,

 gorputzaren tokiyan

 tripa zuben jazten;

 bada goizetik nola

 zan asetzen asten,

 etzuben chanponikan

 sobratzen ikasten.

 Zapatariya berriz

 zinzoro bizizan,

 guchi-beren lanetik

 sobratzen ari zan;

 eta ala langille

 ona naiz ez izan,

 azaltzen zan chukunki

 onenaren gisan.

 Ontan egun batean

 zapatariyari,

 zitzaiola burlaka

 langillea ari,

 aserratu zanean,

 errabiz berari,

 esan zion: ¿zertan aiz

 i orrela ari?

 Egiya dek aizela

 ona langillea,

 bañan ez aiz batere

 fortuna gillea;

 ik dek zillarrezkoa,

 abillidadea,

 bañan urrezko tripa

 au eztek obea.

 ..............

 Azkartasun aundiyak

 asko du baliyo,

 berarekin liteke

 bat goichora iyo;

 bañan tripari sobra

 ematen badiyo,

 aren azkartasunak

 orduban adiyo.