Pakita Artolak gurasoei ongi etorriya
Artola, Jose
Aitari.
Zori onian aita maitia
gaur kanpotik da etorri,
eta berekiñ amoriyua
nigan ugari ekarri;
berorrek nigan dadukan aña
daukat bada nik berorri,
laztan gozo bat eman zayogun
biyotz-biyotzez elkarri.
Amari.
¡O! ama maite biyotzekua,
nere zoramen eztiya,
poz geyegiren indarrak nauka
malko gozoaz bustiya;
berorri gabe ez det nai ezer
berorrentzat naiz guztiya,
musu gozo bat eskatzen diyot
naitasun aundiz josiya.
Aizpari.
Aizpacho nere aspaldikoa
zuretzat daukat biyotza,
gozotasunez oso betia
au esaten ez naiz lotsa;
orainchen bañan poz aundigua
eziñ nezake nik goza,
zori onian etorri zera,
¡nere biyotzak au poza!
Anaichoari.
Anaicho nere maitagarriya,
Jaungoikoari graziyak
asko poztu nau nere onduan
orainchen zu ikusiyak;
penaturikan iduki nau ni
zu-gabe eziñ etsiyak,
bañan gaur emen zu ikusita
joan zaizkit pena guziyak.
Ni.
Ez dakit poza geyegeirkiñ
nola ez naizen zoratzen,
zenbateraño alegra naizen
beok ez dute pentsatzen;
amets gozo bat ez dala ere
etzait bada iduritzen,
nere biyotza beon onduan
zabaldurik da arkitzen.