San Marcial eguna

Artola, Fernando

 San Marcial eguna

 gure egunetan

 Egun sentia dator

 goizero bezela...

 Beltran,

 Azkue,

 Ambulodi

 Irigoyen,

 Arana,

 Picabea,

 Manuel Pedros,

 Lalanne...

 (Goyen beude)

 Eusebio Pedros !

 Lo gozoan daude.

 Bi sutunpa Pun! pa!

 Punpa!

 Esnatu zaigu buruzagia.

 Gaurko agintariak

 Lo egin al du?

 Erriak ere berdin

 loa galdu.

 Zer egin?

 Ialgi kanpora!

 Beazak zeru gora...

 Izarrak zeoztik,

 illargia itun,

 il bear duela ezagun.

 Gorrizta sorkaldea,

 gorritua sukaldea.

 Tatxin-tatxin

 Villarrobledo-eresiak

 (Zerutik igesiak)

 Au duk "mandinga"!

 Prakak txuriak,

 txapela gorria

 garbi-garbiak

 ta, "patrikan" sosak...

 Au duk "mandinga"!

 Ama, ama, jarri bazkaria.

 Arreba, zuk eman janaria,

 goyan bada eraria

 (aufi-aufa!)

 gaur neretzat, Maria.

 Ama, ama!, jarri bazkaria,

 ollasko paria.

 Orlako gertaera,

 ia etxe guzitan;

 kukurruku gutxi

 ollotegitan.

 Aufi-aufa!

 Gaur San Marcial eguna,

 gañera eguzkia.

 Ai, ai, ai...

 (Ori dek irrintzia)

 (Gogaketa)

 Gaurko otoitzak

 egin gabeak.

 Bai, bai, egingo det otoitz,

 Zurekin naiz begi ta biotz.

 Eskerrak; Jauna, egun berri au

 ikusi detalako"...

 San Marcial eguna!...

 Agur otoitza!

 (Mendian otoituko dut).

 Kantinera'ren etxean

 Lore gazte bat,

 Bidasoa'ko lorea,

 pozik dago gaur

 alaitasunez betea.

 Goiz esnatua,

 Zail lok artua

 Zergatik ez ,alde

 ni zure alde

 Gaizo usotxoa

 Kantineratxoa

 Nere Kuttuntxoa.

 San Marcial eguna

 ta kantinera!...

 Gauz ori zer dan?

 Ez bazera Irun'goa,

 ez duzu ikasiko,

 ez duzu ulertuko.

 Zeradena edonungoa.

 Kantinera, zer dan?

 Gure bizia!

 Gure arnasa!

 Gure ametsa!

 Gure kuttuna!

 Ez da joaten nai duba

 baizik berezi deguna.

 Lore gazte bat,

 Bidasoa'ko lorea,

 neskatil panpoxa,

 ille-kixkur "ermoxa",

 gure poxa!

 Zeru goiko aingerua,

 Bidasoa'ko lorea,

 lore garbia,

 eder, julia.

 Neskatil paregabea,

 izar argia,

 guztiz maitia,

 zeru goiko aingerua.

 Erriko poxpoliña,

 etxeko panpiña

 A! nerea baziña!

 Irun'go neskatillak

 kantinera nai.

 Arin eta alai,

 txapel gorria,

 gona txuria,

 gerrontze beltza,

 jantzi nai,

 barril txiki batekin

 Mikeltxo'ren tropan.

 ....................

 (Emen zetoztik)

 Gizonik ederrenak, artxeruak.

 Eun kilo'ra ia denak urbilduak.

 Piko, pala ta aizkora zorroztuak,

 mantarra artillez, altzoin larruzkoak.

 Gizonik ederrenak, artxeruak.

 Txiruli-ruli soñuak,

 talin-talan eskillak,

 rataplan-eres mutillak,

 ¡pun, pa, pun! su-izkillak.

 Txapel gorriak

 nola loriak,

 praka txuriak

 nola liliak.

 Txuri ta gorri,

 gorri ta txuri,

 Irun'go semiak...

 Fede dun erria bezela

 joan zaizkigu Elizara,

 Juncal'eko Ama maitia

 biotzez agurtzera.

 Andik apaizak artuaz

 San Juan-arri'ra ostera.

 Zenbat jende etorri dan

 gure festa ikustera.

 Santa Elena karrikan

 autsi errenkak.

 Nor bere bidetikan

 ariñik ankak,

 txistu ta kanta,

 cup! ta sutunpa,

 Aldabe zear

 goazen goruntza.

 Zarrak, gaztiak,

 Irundar guztiak,

 neska ta mutillak,

 ogei urteko pillak

 aupaka dijoaz,

 irrintzi ta algara,

 gora beti,

 beti gora,

 San Marcial mendira.

 ....................

 Irundar urrunduari

 Irun'go seme erbestetua, Irun'en da gaur gogoz,

 Ezin du antzi, gaurko eguna, emen da begi ta biotz,

 emen da begi ta biotz.

 Aiek oroituz, nere biotzak diozka maite agurrak.

 Oro gera-ta, Irun'go seme, Jaungoiko beraren aurrak,

 Jaungoiko beraren aurrak.

 Ez bada egin, ez egin negar, irundar erbestetua;

 biotz zabalez emen gaituzu, zu agurtzeko zaletuak,

 zu agurtzeko zaletuak.

 Gauz ederrik munduan ba'da, bat da San Marcial eguna.

 Irun guziak begikoa du, gogokoa ta kuttuna,

 begikoa ta kuttuna.