Gogoaren eta gorputzaren zilbor-hesteak
Harzabal
bi kate;
biak ebaki beharrezkoak:
bat gorputzaren bizitzeko,
bestea gogoaren askatzeko.
adizu, ama
ba dakizu
sortze berean
zuri gorputzez lotzen ninduen
zilbor-hestea
sendagilleak nola ebaki zuen.
lehenengo eten beharra izan zen:
bizitzaren
bizitzeko lehen legea.
Sein-zaroan
zure titia eman zenidan;
aur-zaroan
eskoletara bidali ninduzun,
bizitzarako harmak hartze-arren.
dana eskertzen dizut;
duan balore guztian,
nik ahal dutan neurrian.
bainan, gaztaroan
amatxo maite!
ohar zaite
benetan maite nauzun ama
izan nahi baduzu
eta nik zu maitatzea,
ni naizena
nik izatea nahi dutana izatera,
ez utzi bakarrik,
bultza behar nauzula.
hau baita bide bakarra
biok alkar sanoki maitatzeko,
biok alkar osoki eta betikoz maitatzeko:
zuk zure nortasunaz,
nik nereaz.
ama!
eten dezagun
lehen gorputzarena bezela
orain,
gogoaren zilbor-hestea.