Itxaropenezko bide barrira

Markue

 Miñezko kantua amodiozko kantuan

 Biurtzeko,

 Ezteukat bildurrik

 Neure burua ukatu

 Ta bertanbera itxiteko atzoko bideari.

 Badakit.

 Bai, badakit

 Gogorra izango dana.

 Gogorra?... Eta nork daki?...

 Aldabenaren

 Laguntasunagaz

 Atx-tontorrak be zelai biurtzen dira sarritan.

 Eskeko egingo dodaz neure eskuak

 Buru-biotzen morroi

 Alguztidunaren aurrean.

 Eta,

 Bere kerizpea

 Eskatuz,

 Beragan itxarongo dot

 Eta aurrera jarraitu beti,

 Bertanbera betiko itxitako bideruntz

 Atzerantza

 Barriro begiratu barik.

 Bizitza barriko bide latzetan

 Ankapietatik odola dariola joango naz,

 Aurrerantza,

 Aurrerantza beti,

 Atzeruntza begiratu barik,

 Konturatu barik,

 Egillearen Egian

 Sinistuaz,

 Txoriak egan egiten dauban moduan.

 Eta

 Txori askatuaren

 Kantuan,

 Kantauko dot:

 «Maitasunez

 Maitatuko dodaz

 Bizitzakin batera emon zeustazan Aginduak».

 Eta gero,

 Iñoiz be illuntzen ez dan eguneko

 Egunsentian,

 Ixiltasunezko paraje zelaira

 Joaten naizenian,

 Errukarri

 Ta Parkamenez

 Artu nagizu,

 Maitasunez Zugan Sinistu ta Itxaron egin dodalaka.