|
Loreak eta zimaurra
Bordari
Loretxo-bi, ari ziran
Landa-hegi-egalean
Berriketan.
—Aizan, bai gerala eder
Usai ta yantziz. Aberats
Koloretan.
Gu gaitun, gu, apaiņenak;
Sotil eta maitienak
Mundu ontan.
Nortzu izakitan gu lako?
Naizen klabeliņak, ez diņ
Parerikan!
Ez al den, larros laguna
Egia, nik ben-benetan
Diņotana?
Bitarte, bai a la fede!,
Zeok, gu'tik... zimaurrera.
Alajaņa.
—Arrazoi dun, klabeliņ polit;
Gure soinekoak ez diņ
Berdiņikan.
Ezta Salomon berare
Gu lez yantzi. Ezin ere,
Iņundikan!
* * *
—Zaudete ixillik, arroputz
Alenak, dio basterretik
Zimaur onak.
Eder; ederrak zerate.
Polit; txoil-politak, noski;
Zorionak!
Baņa, zeņeri eskerrak
Zerate, eder eta polit?
Esan, esan!
Zer ziņateke, orain, gaur,
Zimaurrik ez pazenute
Arteka, yan?
* * *
Menpekoak ez direla
Ezetsi bear, diņosku
Alegiak.
Ta arrokeria itsusia
Dala: orai eta beti
Ikasgaiak.
|
