Udaberria

Joxe Austin, Pasiotarra

 Ikaraz daukat barne-giroa

 eztiaren larriz...

 dardar urtika biotza

 pozkario biziz...

 Gaztaro-printza daramat trinko

 soiñ edergarri ta jantziz.

 Gaztetasuna, zirrara batez,

 koloka zait gaur oiñarriz.

 Zer dedan ikus,

 zer dedan senti?

 Zerk naun arritu.

 zerk naun eztitu?

 UDABERRIA eder,

 txistirikian;

 bizimenaren magal

 liraiñ, garbian...

 Zer dedan ikus,

 zer dedan senti?

 Euskalerria

     UDABERRIAN

 UDABERRIA

 Euskalerrian!!

 Bizi-ikara,

 txinpart-kemena.

 gaztaro-garra,

 suzko almena,

 Euskalerriren odol gorrian...

 Zerutar intza,

 arnas-bizitza,

 gaztaro txertu

 joria estu,

 ene erriaren gorputz zolian...

 UDABERRIA

     Euskalerrian!!

 Euskalerria

     UDABERRIAN!!