Oihan berde luze hartan

Aurelia Arkotxa

 Oihanean sartzeko bide hertsia hartu duzu. Blueberry hablen pikor

 ubel-beltzek pindartzen dituzte bide-bazterrak. Esku hautraka hartzean heriak

 moratu zauzkitzu. Aho-sabaia usain goxoz bete. Oihanean sartzeko bide

 hertsia hartu duzu. Itzalak haunditzen ari. Zuhaitz ikaragarrien artean den

 ixiltasun bortitza entzuten duzia? Oihan basean ipuinetako haur hura zara.

 Ttipi ttipia. Oihanean galdua.Itzalak luze. Beldurra zutaz jabetu da ja. Zainetan

 brustaka kurri dabilkizu odola. Punpa - panpak belarrietan entzuten dituzia?

 Omen mamuak badabiltzala oihan hetsi hauetan. Jakin bazinu bederen

 eztela egia. Iparrago direla. Norbaitek erran balizu bederen! Bainan blueberry

 azukratuak maite dituztela badakizu. Zuk bezala, funtsean. Eta hemen,

 blueberryz estalia dago bide bazterra. Badakizu ongi aski mamuak lanjerosak

 direla. Etzaiela begietara so egin behar, eta atakatzen badute hobe dela

 hilarena egin. Han artean, oihana arratsean sartu da. Eta zu, izialduraren

 hondalezean.

 Kondalari hunek gezurrezko beldurra zela erran balizu, sinetsiko ziniona?