Itsashegiaren hutsa

Aurelia Arkotxa

 I

 Ur bazterrera

 untzi haundien

 ikustera

 elkarrekin joan gogo zuten

 Donibaneko hondartzatik

 nola itsasturiak balea arrantzara zihoazen

 ikustera

 Bizkitartean

 hiru mende

 hutsa zagola itsasoa

 Halere etzuten etsitu

 itsasoaren bertzaldera

 untzi haundiak estali ziren lekura

 nahi baitzuten heldu

 Eta lanoan ziren urtu

 II

 1676.eko urte benedikatu huntan

 Voutremer irakaslea

 Dieppetik Havrera joanik

 eta handik

 itsasoz-itsaso

 hegoalderuntz

 saionako portuan jeutsi zen

 piaiaz nekatua aspertua

 haize euritsuak

 ile lotuak harrotzen zizkiola

 Jakoberen makila

 bi globo

 itsas-orratza

 esfera bi

 eta astrolaboa

 bazekarzkien

 berekin

 hidrografiako irakasle berriak

 III

 1676

 Iturriko bi untzi haundiek

 badu aspaldi

 belak haunturik

 urak eztituztela pasatu

 Ziburu 1999.ko buruilaren 16a

 IV

 Uda bururatzen ari

 goizeko sei t'erdiak

 argi dorre gorria itsashegi muturrean

 ahate beltz papo argiak zirristaka ur gainetik

 urrunean balea ilunaren lanbro zuria

 1999. ko agorrila, La Martre (Kaizpe-Québec-)