Mandingue meza, negro-afrikar ehorzketentzat
Mamdou Traore Diop
Hilgo naizenean
irrigin beharko da, far
hiltzea bizitzea baita
hain bizirik dauden arbasoen artean.
Otoi, otoi
ez eman gustatzen ez zaidan
ohorerik
batez ere ez hilak negartu
irrigin beharko da, far
hiltzea bizitzea baita
hain bizirik dauden arbasoen artean.
Ene etxe zaharraren bihotzean
beharko da, batez ere, attabala jo
herriko lagunak betozkidala,
caseko adiskideak betozkidala,
Pazifikoko leihorretarik
betozkidala ene ahaide urrunak.
Dantza! Kanta zazue
attabalen arrailduran
zuen bihotz zoriontsuek
lauzka nezatela!
ez otoi ahantz nere pipa herbaildua
eta, gure zelai maitagarrietako
tabakoz bete ezazue!
ez ahantz palmatzeen arno sukratua
ah! gure oihan askeen alkoholez
hain perfumatua den arno eder beltz hori!
Eta zuek, gogoko neskatxek,
zuen esku ahur miresgarrietan edatera emazue
eta lurra urezta dadila goizetik arratsera,
lurra ase dadila batez ere
hirugarren egunaren argi zirrintaraino...
Orduan, attabala jo beharko da odoleraino
eta attabala jo
eta attabala jo, hirugarren egunaren gaueraino,
ah! ez naiz herritik aterako
zuen kalabaza beterik gabe,
zuen irririk gabe, zuen farrik gabe...