Kantu eta auhen hiri okupatuan
Daniel Filipe
2
Gero eta amultsutasun gehiagorekin, lo gabean, kantatzen dut.
Angustiaren lore xinpleekin,
kantatzen dut.
Oldarraren, krisiaren hitzekin, amesten dut,
altxatzen dut, ostatu huts eta alimalearen mahaiaren gainetik
ene itzultzerik gabeko piaiaren ametsa.
Bakardadea tronpatzeko, beldurra,
eleak erraiten ditut, musika, esperantza.
Kantatzen dut bizi naizelako eta
kanpañako izaitearen kondizioneari lotua eta fidela naizelako.
Zeren eta alferrik digute oroimena suntsitzen
maxinekin, errotekin, honorarioekin.
Zeren eta iduzkiak sutan ematen du zure hilea
eta ene ezpainek desiratzen baitituzte zure bularrak.
Kantatzen dut kabala apokaliptiko ikaragarriaren
espektro ezin definituzkoa izi arazteko.
Kantatzen dut eta goraipatzen zure loa, adiskide anonimo,
zu, nunbait gordea, izerditzen eta lanean ari zarena.
Kantatzen dut zure kuraia orokorra,
praktikan kantoinatua eta hortik kanpo.
Kantatzen dut ausikitzen, ofenditzen den bezala
eta leher eginik, erresistitzen eta bizitzen entseatzen denak bezala.
Kantatzen dut jakiteko balio duela
boza ukaitea, muskuloak, nerbioak, bihotza.
Ostatuko mahaiean, karriketan, kantatzen dut.
Baratzetan, estadioetan, sufritzen eta kantatzen dut.
Ganbara abandonatuan, amesten eta kantatzen dut.
Zure beso eztien artean, negar eta kantatzen dut.
Egunsentia laxatzen dut ele serioekin,
kantatuz. Berramesten dut melodia,
iduzki idekia, amodioa karrika izkinetan,
soinburu biluzietan marka sentsuala,
haurtasunaren oroimena, zure aurpegia
- eta kantatzen dut.
Bizkitartean deusezendako,
kantatzen dut.
4
Ez da aski eskua gorputz ebakiari buruz luzatzea, hileak berari
karesatzea eta erraitea : Egun on maitia. Bihar banoa.
Ez da aski asmatutazko ezpainetan muxu ezti eta lasterrezko baten
freskura pausatzea eta erraitea: Ateak hetsiko dizkigute. Bainan egon.
Ez da aski gehienik gustatzen zaizkigun gauzen azal komodo erritual
eta xuxena maitatzea eta erraitea: Heriotza da bidea.
Ez da aski Maitaleari begiratzea erahilketa edo irain bat balitz
bezala eta halere murmuratzea: Bida gara eta nahi ta ez eskatzen dugu.
Ez da aski piaiako maletak ametsez betetzea, etiketak ezartzea eta
baieztatzea: Entseatzen naiz ahanztera.
Ez da aski, gauaren ixiltasunean, musika asots eta interferentzi arinen
artetik boz estraino eta distantziaduna entzutea.
Ez da aski uros izatea.
Ez da aski primadera.
Ez da aski bakardadea.
3
Ez bazen karrasia nabala
kolpez ahalmenaren
muga urratzen ari
Ez bazen izan aurpegia irria
hondartzako hilikiaren
antsigabeko postura
Ez bazen izan lorea lore-hostoa
gorri bizian ateraia
urrunean saltzaileen ikanta
potreta ahantzia
polboraren gustu goxoa
leihoaren grilla
Ez bazen izan kaia ukantza
gaueko sekretuarena
suge bipera polizia
Pariseko gutuna
maitearen ausentzia
Ez bazen izan krokodil baten
hortz zorrotza
Ez bazen itsasoa hain hurbil
Ez bazen trahiziorik izan