Sortzekotan

Leon Haizagerre

 Hainbeste lore eta koloreen

 miresgarriko piztearen urrakoa

 Primaderaren oiharzuna

 aurtengoak dakart

 orai artinokoek ez bezalako tirria

 ekarri daut

 hatsa.

 Sartu nitzaio sabelean,

 ikusi ditut

 mendeak eta mendeak

 ibili naiz

 sukar, ikara, izerdi hainitzen

 artetik

 bizitze eta heriotze bakarren

 erditik.

 Garrasi bezenbateko hagunez

 hainitz eta hainitz

 xuti arazten zituen

 jende, populu ala lur

 hats horrek.

 Eta

 egundainoko ixtorio

 berriz heriotzerat zoatzin

 harrien orroitmenean seinalerik ez duen

 heriotz erat

 hainitz eta hainitz,

 igaiteak jaustea duen mito lilluragarriak

 zirimola zoramenean burtxoratuak zauzkala,

 piztu nahian

 ezin piztuzko oihu minez

 zintzur eta hezurrak higatuak.

 Nihaur ere zoramen hortan

 luzaz igerikatu naiz.

 Ez dakit zergatik

 ez dakit nolaz

 hatsaren zainetan

 denboraren mixterioa xurgatu dut.

 Horra nun banoan

 eta ez naiz bakarrik

 hatsaren urratsean

 ate batetik besterat

 urrakoz urrako

 bainan ez hats hanturik,

 sortzekotan.