inprimatu
Gorputza
Izenburua:
Gorputza
Sinadura:
Jean Louis Davant
Urkizaren iruzkina:
Egilea(k):
Davant, Jean Louis

Argitalpena:
Maiatz.
Urtea:
1982
Argitalpenaren urtea:
Alea:
2.zk.
Orrialdea:
49

Gorputza

 

Jean Louis Davant

 

 Ene itsasoa ta ene uhartea

 Gorputz et'arima da,ber-ber emaztea.

 Lehena mila bider dut goraipatua.

 Bestea zergatik da ezin kantatua?

 

 Zure begiak

 izar argiak,

 guztia zeru

 zola leinuruz

 berde-urdinak.

 Zure biloak

 odei harroak

 ta basaihenak,

 ta zur'ezpainak

 ezin erranak.

 Zure besoak

 bago basoak,

 gaizo maitale

 honen babesle.

 Haien erdian

 zure bularrak

 dira eperrak

 mendi hegian

 bezain ederrak.

 Zure gerria

 da mandolina

 bezain eztia

 ta txirribika

 ez da hain fina.

 Zure bi anakak

 berriz gitarra

 bezain azkarrak.

 Azpi sendoak

 arku ondoak.

 Zango arinak

 zutabe finak.

 

 Coi ta pea sotila, erdia papuna,

 Hirur tontor mazela puxantez aztuna,

 Borobila, betea, desiren erpiņa,

 Emaztegoa hor da zinez erregiņa.

 

 Amodiozko lore, aho maitalea,

 Gorputz et'arimaren ateka gordea,

 Larrosa gorria,

 Ezpainez joria,

 Opar'idekia,

 Botzez dantzaria,

 Txorabiatzen naizu maite zaitudanez,

 Haboro ezin erran, ez bada laztanez.

 

 Emaztearen gorputza oso maitatua

 Kantatu behat zaitut merezi duzun lez

 Baina zure aurrean nagozu beldurrez

 Enetzako baitzara guztiz sakratua.

 

 Zoritxarrez hortik pasa bekatua:

 Historiaren barna zenbat izan zara

 Saldua, zapaldua, joa, bortxatua,

 Ta nitan azkar daukat ar tzarren adarra.

 

 Lotsaz beterik bainaiz, ezin dixot erran

 Inozenki, ederki, nahi nuken eran,

 Lehen Adamek nola zaituen ikusten.

 

 Nere hutsa maizegi baiterauzut uzten,

 Barka zadazu otoi lotsa eta hotza,

 Begi, bihotz, adimen, asmu, hitzen motza.

 


inprimatu