Josu Goikoetxea

Iparretik hegora

 Erosi berri diodan atlas haundia

 Zabaldu du umeak gauean

 Eta andere afrikarrak

 Eztul egin du

 Orriak geldiro irentsiz

 Koloreak ezberdindu ditu

 Eta herriak eta ibaiak

 Eta andere afrikarra

 Galdua eta egarri da gauean

 Eta mendiak basa eta hareaz

 Dira eginak munduaren liburuan

   (Umeak hala ulertu du)

 Eta itsasoak nonbait bukatzen ei dira

   (Egia, umeak ikusi du)

 Eta andere afrikarra

 Noraezean kalerik kale

 Iturrira hurbildu da

 Iparra goian dago

 Hegoa behean

   (Bazekien hori umeak)

 Iparretik begira

 Hegora jarri da

 Eta andere afrikarrak

 Ez du jadanik urik nahi

 Beldurrez da gauean

 Eta gorantz begira, hala zegoela

 Urruneko ume baten hatz txikia

 Sentitu du bekokian

 Min eta negarrez hil da, jakin gabe

   (Afrika —dio umeak—

   Afrika gustatzen zait)

 Eta loak hartu du