Josu Goikoetxea

Tiranoa ez zen tirano

 Tiranoa ez zen ergela

 Tiranoa ez zen tirano

 Bere gortea ederra zen

 Bere gortea honela zen:

       ezker-eskubira profetak

       (pentsalari, poetak

       eskribau eta beste)

       aurrean indarra

       (arma eta irribarrea)

       atzean umeak, gerorako

       ondo haziak, ondo heziak

       tirano izango ez ziren

       tirano izateko

 Tiranoa ez zen tirano

 Argi gera bedi:

 Tiranoa ez zen tirano

 Tiranoa ez zen ergela

 Herriak maite zuen

 Hala zioen berriak: «Maite dugu geure burua!»

 «Gure nazioaren izaera ezin hobea da.

 Jakin bezate gure auzoek gure berri ona.

 Hori ona da». zioten profetek

       liburuak eskuan arrazoiaren indarraz

 Eta tiranoak bialdu zituen auzoetara

       bere untziak eta bere zientzia

       eta jende guzti hura urrez jantzi zuen

       aste betez

 Tiranoa ez zelako ergela

 Tiranoa ez zelako tirano

 Eta askeak ez ziren gizon askeak

       altxatzen ziren batzutan

       baina bakardadeak sortutako penaz

       hil edo mutu geratzen ziren

 Tiranoa ez zelako ergela

 Tiranoa ez zelako tirano

 Eta gertatu zen behin

       ahots bat altxatu zela esanez:

 «Ni izango naiz orain tiranoa ez den Tirano!»

 Eta tiranoa ez zenez ergela

 Tiranoa ez zenez tirano

       utzi egin zituen bere tronua eta bere atorra

       eta profeta bihurtu zen berak ere gurtzeko

       tiranoa ez zen tirano berria

 Zeren tirano berria ere ez baitzen ergela

 Tirano berria ere ez baitzen tirano

 Eta profetek eta bestek

       gurtu egin zuten tiranoa ez zen tirano berria

       ona zelako

 Eta ezker-eskubian jarraitu zuten urtetan

       beren esker ona erakutsiz

 Eta gauzek berdin segitu zuten luzaroan

 Ondo, alegia

 Tiranoa ez zelako ergela

 Tiranoa ez zelako tirano.