Ama ta aurtxoa

Larramendi'tar Iñaki

 Aurtxo txikiya siaskatxuan

 Negar ta negar geyago

 Amets beltz batek esnatu eta

 Etsayen beldurrez dago.

 Ixildu zaite, ez beldur izan

 Amatxo zure zai nago

 Nik magalian gordeko zaitut

 Nere maitia egin lo.

 Aurtxo txikiya lotan zegoen

 Amatxoren magalian

 Beste ametzak esnatzen zuen

 Oso tankera onian.

 ¡Amaren poza bere umia

 Farrez-farrez ikustian!

 Musuka dago, ezin aspertuz

 Semetxuen masallian.

 Amatxo goitik bera begira

 Aurtxoa betikan gora

 Amak festa ta festa dagio

 Umiak berriz algara

 ¡Biyen arteko gozotasuna

 Musu ta besarkada!

 Ama ta seme zeruan daude

 Ludiyan zerurik bada.

 Aurra siaskan ostikotxuaz

 Estalki danak botatzen

 Amatxo berriz maitetasunaz

 Ura berriro estaltzen.

 Lantegi ontan ama semiak

 Luzarotxo ziarduten

 Ama gaxuak otzan beldurrez

 Besotara da jasoten.

 Aurra goziak negarrez dago

 Amatxoren magaldian

 Ama on-onak besarkaturik

 Ipintzen du bularrian.

 Bere bularra estuturikan

 Umian aoko oyian

 Biotz sumua ematen dio

 Esniarekin batian.

 Pozaren-pozez esturik dauka

 Amak aurtxoa gerritik

 Umiak berriz bere amari

 Eldutzen diyo lepotik.

 Biyok daukaten barren-izketa

 Biotzera biotzetik

 Arriturikan entzuten daude

 Aingeru danak zerutik.

                                                 Vera del Bidasoa. Abendoa. 1949