Goresmenak

Zubiria, Jean Pierre (Panpilli)

 1

 Laudoriozko kantuak Euskal-Herriko kazetan

 Irakurtuak ditugu iragan aste hoietan

 Etcheberri jaun apeza da izan berri ohoretan

 Goresmenak ezarri dazko bere lagunak pertsutan.

 2

 Berrogoita hamar urte Etxeberri apez dela

 Dohain haundiez betea eta zer apez lehiala

 Guzieri erakusteko beti berena dutela

 Urruñarrek ospatu dute merezi duen bezala.

 3

 Hemen oral aïpatzen dut horren lagun delakoa

 Euskal-Herri guzian da aspaldi ezagutua

 Eliza gizon xarmanta eta, hedadura haundikoa

 Kantuz artzeko boz bat ere eder bezain arraroa.

 4

 Igande ta bestaburu eliza hoitan kantari

 Horren boza entzutea plazer eta xoragarri

 Lau hogoi ta hiru urtetan airoski pertsutan eri

 Nola pentsa horrek zuela hoin ederra dohain hori.

 5

 Bi herrietan egonak, elgarren auzo erretor

 Orai xahartuak bainan itxuraz oraino pixkor

 Urruñarrek Etcheberriri besta bat muntaturik hor

 Gonbitua igorri zion «laguntzerat baita etor».

 6

 Jada badu zenbait urte kargua dutela utzi

 Erretretaren hartzea ongi baitzuten merezi

 Beren heineko lanari Aran biak berritz laster hasi

 Beren saila airoski inez hor aintzina badoatzi.

 7

 Xoragarri ikustea holen otoitzeko karra

 Hoiekilan predikua.bihotzeraino sarkorra

 Biak bardin beztitzen ere atxikiz moda xaharra

 Betidanik ikusi dugun apezentzat in xamarra..

 8

 Elgarrentzat lagun haundi izan dira egundaino

 Amodioz atxikitzen biek elgarri oraino

 Hoikien trenpuko apezak, Euskal-Herrian direno

 Elizetan ibiliko da beti ainitz girixtino.

 9

 Bi apez horiek ditut aspaldiko ezagunak

 Aspaldi sortu ginen ta hatxeman gaitu adinak

 Ene ganik ukan betzate goraintzirik beroenak

 Oinon luzaz gure artean utz detzala Jainko onak.