Gure euskera
Zapiain, Juan Kruz
1
Nere barrengo estuasun bat
kantuz beardet zabaldu,
Euskalerriko anai maitiak,
nai banazute lagundu.
Oinbeste urtian dagon izkuntza
orain ari digute galdu...
Gure Jainkuak orrelakorik
arren, utziko ez al-du!
2
Naiz aberetsa, naiz beartsuak
zar, gazte, aundi, txikiyak,
jakitun egin nai nituzke gaur
euskalerritar guziyak;
danon biyotza ikui ditzala
Jaungoikuaren graziyak
ikas dezagun zer lege diran
guraso zarrak utziyak.
3
Lurzabal onen asiyerako
emakume ta gizonak
Euskeran eta Nekazaritzan
ill arte jardun ziranak...
gure guraso Aitor ta Amalen
ogibide au izanak...
Biyok dira gaur geyen-geyena
zokoratutzen diranak.
4
Jakiņa dago izketa-era au
eztala sortu berriya;
irurogei ta amar etxalde
ziran garayan jarriya;
Babiloniyan izandu zuten
naspilla izugarriya;
ordukua da guk oraiņ degun
Euskera maitagarriya.
5
Euskerak zenbait urte dituen
oso jakintsu ez nagu
biņipin Jesus baņo berrogei
ta amar gizaldiz lenago...
Aitor izena zuen aitona
aztua ez da egongo...
galdu baņo len gozo pixka bat
ez al-diyogu emango?
6
Sei milla urte inguratuak
entzun izan det dirala
irurogei ta amar izkintza
munduan jarri zirala
-ordukua da gure Euskera-
ta artian iņor eztala,
Aitor etxalde guztiyarekin
onera etorri zala.
7
Euskaldunaren iturburua
Tubal'en seme Aitor zan:
aren ezpaņetan gure Euskera
orain ez bezain jator zan;
gure aitonen txiki denboran
ere alaxe omen-zan,
baita gaur ere erbestetikan
jendia nastu ezpazan.
8
Iturri ontan len ur ona zan,
orain nastua ta otza;
gure artian bein egin zuen
lurmentzen ez dan izotza;
birau zikiņik nai eta ere
ezin esan dan izkuntza...
au galdutziak erdibitzen du
euskaldunaren biyotza.
9
Erdalkeriyan berotu gera
sinismenian ozturik,
gabiltzalako erbestetikan
jendiarekin nasturik;
ba-dirudigu bizi gerala
nor ta zer geran azturik...
lotsagabe ta izkuntza txarra
ortik ez dator besterik.
10
Ai euskaldunak! Ez ote-gera
noizpait zintzatzen asiko?
Bide ortatik zer datorkigun
laister degu ikusiko;
Euskerarekin Euskal-erriyan
ez gaitu iņork autsiko:
Euskera gabe berealaxe
etsaya zaigu nausiko.
11
Eztago urrerik, ezta zillarrik
mundu onetan dagonik,
nor bere etxian jaun eta nausi
izatia aņa danik.
Gu galdu nayez dabiltz etsayak
uts egin gabe egunik...
baņan gutarrik izango ote-da
morroi bizi nai duenik?
12
Bedeinkatua izan dedilla
Euskera zure itzala!
Zuk erakutsi ziņidan neri
munduan iņor nitzala.
Zeruko Jaunak milla urtian
gurekin gorde zaitzala!
Zu iltzekotan, erri ta mendi,
urak iruntsi gaitzala.
