Hi burutik hago, Joxe Juan

Xalbardin

 Jaunak ideki begiak

 irakurtzeko egiak

 otso larruaz jantzi zaizkigu

 etxeko ardiak

 eguneroko keriak

 kolpetik eten hariak

 diru-guraizez itzali ditu

 pobreen argiak.

 Gasteiztik Donostiara

 bertako Aldundiara

 zuzendu dira hoien urratsak

 hango bilkurara

 bildots sarabeetara

 aberatsen askara

 bazka-janari bila gatoz gu

 emaiguzu bada

 Hesia aurrean jarri

 zaintzen ertzainak ezarri

 halere gose indarrek ezin

 onik erakarri

 ertzainak gutxi ta larri

 honuntz laguntza ekarri

 oikatuaz estutu dute

 Gonzalez Txabarri.

 Batetik presidentea

 bolumenez dexentea

 HABEko buru den Joxe Joan

 bestetik jentea

 zakurrek buztan tentea

 jiji, jajaz barrunpea

 morroi gisara jefeak deitu

 marroi tenientea.

 Pasako haiz historira

 ilunpetikan argira

 hik xelebreki moldatu bait duk

 zuen tirabira

 zakur marroiak erdira

 euskalduntze harrobira

 gure hizkuntza ler erazteko

 egokiak dira.

 Teniente horren arreta

 ongi gera nahia eta

 hutsik zegoen zakua berez

 orain hik beteta

 ta beraientzat gordeta

 mutur gainetik esteka

 hogeitamaika eskuz aldatuz

 galtzaile AEK.