Iru erregeak

Urruzuno, Pedro Miguel de

 Erregeak dijoaz

 Mendietan bera,

 Berai lagunduaz

 Goazen Belenera.

 Begira, bai, begira,

 Kontuz sortaldera,

 Ara non agertu dan

 Izar chit ederra;

 Berri on-enbat dakar

 Zerutik lurrera,

 Erregeen giari

 Dijoa aurrera.

 Erregeak ondoren

 Datoz izarraren,

 Baltasar, Melchor eta

 Gaspar irugarren;

 Jesus adoratzera,

 Umill egon arren,

 Anditasun guzia

 Orra non datorren.

 Izarra zayelarik

 Belenen gelditu,

 Beren adimentuak

 Dizkie argitu:

 Estalpe baten Jesus

 Dutela arkitu,

 Bere pobrezaz dira

 Osoro arritu.

 Bigungarritzat dauka

 Askako lastoa

 ¿Nola ez da egongo

 Aurchoa oztua?

 Asnasaz berotzeko

 Idi ta astoa,

 Orra nola dagoan

 Justuen justua.

 Badakigu zerala

 Zeru-lurren jabe,

 Ona urre ta mirra,

 Inzensua ere,

 Eskeintzen dizkitzugu

 Dan bezela lege,

 Bada zera Jaungoiko,

 Gizon ta Errege.

 Etorri gera Jesus

 Zu adoratzera;

 Ori egiñ ondoan

 Bagoaz atzera;

 Zeruko aingeruak

 Betoz kantatzera;

 Agur Jesus maitea,

 Bagoaz echera.