Ni neska, hi mutila
Urdangarin Goņi, Joxe Luix
Egoera honek aspalditikan
guztiok hartu gaitu lepotikan
emakumeok beti azpian
gizonentzako beti lanean
nazkatu gera,
konpondu behar da egoera
iritsiz maila berdin batera.
Orain artean tresnak bezala
zuretzako ginen, ez al da hala?
goiz ta arratsalde garbiketetan
beti jaia izanaren penetan.
Zenbait esanda,
gero begiondokoa, danba!
Gure bizitza hau zenuen ba.
Goizean goizik jaiki ohi nintzen
eta zuri gosaria prestatzen.
Gero egiten zenuen alde
gau ilunarte itzuli gabe;
ta ni etxean,
nere lanetan bete betean
orduan soilik nintzen pakean.
Gauez etxera itzuli eta
zenuen barrua ardoz beteta
orduan haserre egoten zinen
neri joaz gozatzen zenuen.
Gero gauean,
nitaz aprobetxatu nahiean
izaten zinen beti ohean.
Ni azkenean gehiago ezin ta
nituen kemen guztiak bilduta
laister kalera irtena nintzen
laguntzaren bat edo bilatzen;
ta azkenean,
feministen elkarte batean
partaide egin naiz larunbatean.
Elkarte hau da nahiko berria
neretzako zerutik etorria,
beste emakume asko daude
jasandako hamaika neke,
ta hauek denak
aspaldi emazteak direnak
hau konpontzeko presto daudenak.
Aurrerantzean etxe honetan
biok ariko gerade lanetan.
Nerekin izango zara ernai
ez ba dezu denuntziatzerik nahi,
egin zazu zin
eskubidez geradela berdin
ta ez didazula zuk egingo min.
Emakumeak izandu gera
betidanik boteak bazterrera
esklabu modun beti etxean
ilusio onaren ezean.
Gure ideak
itxirik zituzten lehen bideak.
Orain ditugu eskubideak.
