Nikola Etxegaray ene soldado lagun zenari
Trounday, Piarre
1
Armadan sartu berria eta goiz jeikirik nindagola
Soldadotegi gorte hertsian hasperena nariola
Norbait hurbilduz erran zerautan pipa hila zitzaiola
Sua emanik ohartu nintzan hor, euskaldun bat zagola
Han ezagutu ginian elgar, orhoitzen hiza, Nikola?
2
Hi Senpereko, ni Ortzaizeko berri gintian lagunak
Gure sor lekuz lehen solasak erabiltzen ditugunak
Iduri zian biak ginela betidanik ezagunak
Anaia batzu bezala jarri, nola ginen euskaldunak
Arinagoak zitian gero guk han iragan egunak.
3
Hire kexua nik sinaturik jauzlari hegazkinetan!
Behar gabeko erhokeriak zirela erraiten hautan
-«Halako batez, ta zoritxarrez, gerta hindaike pusketan»
Berdin egia izan zaikela pentsatzen nian artetan
Hi zintzoago, izaite hori ez baitzen ene kaltetan.
4
Denbora horrek urteak ditik, orai hogoi-ta-hamabortz
Geroztik elgar bakan ikusi, urrun bizi nizalakotz
Ene lagunez ez nauk ahanzkoz ta sustut hi bezalakoz
Aspaldian ez ele eginak, gaurkoun ordu zelakotz
Joan den Bazkotan Senpereraino jina nindian hortakotz.
5
Hire arrebek eman berria, zauritu nauen nabala
Heure andrea galtzeko doluz izanik jasan ahala
Hiaur Baionan, eritegian, gaitzak hartua hintzala
Orai mundukotz, hire bizia piru meheak zaukala
Itzul jestuka, han gelditu nauk, zozo mutua bezala.
6
Giltxurrinetan egin dauk beraz min lazgarriak ausiki
Eritegirat hi ikustera ez jinik diat urriki
Bainan ez nian aski bertute aitortzen daiat garbiki
Etxerat jin nauk, ezin sinetsiz gaitzak hauela aurdiki
Hire itxura sendoa nahiz beti gogoan atxiki.
7
Agorrilaren bederatzian berriz haut ikusi gogo
Bainan mundua utzirik daukak zonbait oren lehenago
Biharamuna, ehorzketako, hemen elizan bainago
Hiru lau ehun, lagun aldea hitzat otoitzez baitago
Hor ikus daikek zer lagun ona hugun orai gutiago.
8
Elizkizun bat ospetsu eta ederrari datxikola
Lau esku gazten erhietarik hor zilintzo hindagola
Hi ganat azken behako horrek lanbrotu naik zeru zola
Gure munduko agert-aldia Jaunak izartzen dik hola
Haren beraren,argian berriz ikusi arte, Nikola.