Biriatu

Pagogaña

 Erri kutun txikia,

 lorez apaindua,

 mendi-kabi batian

 zaude kokatua;

 etxe txuri gorriak

 daude inguruan

 zarrak edo berriak,

 bizkorki txutikan.

 Aintza dezaten oro

 Jaunaren izena,

 jendetza bildu nairik:

 entzuteko meza,

 din dan jotzen alaiki

 daudela eskillak,

 tontorrean opainki

 dager zure eleiza.

 Eleiz ondoan daude

 erriko obiak

 beterikan gurutzez

 lurran finkatuak;

 lore berezi sortez

 dira margotuak

 nekoste zabal pean,

 kendurik sasiak.

 Egunez alaitzeko

 erritarren lanak,

 txoriñoak goizero

 ari dira kantan

 txiro liro gozoez

 zugaitz adarretan,

 itzaia dijoalarik

 idien aurrean.

 Pillota-plazan garbi,

 lau jokalariak

 ari dira bizkorki

 nork irabazian;

 jokoa bukatzean

 garaillen oiuak

 erantzunak dauzkate

 erriko basoan.

 Gabaz, mendi kabian,

 lotan da errixka;

 illargi laurdenari

 txakurra zaunkaka;

 eleiz dorrean untza,

 geldige uluka;

 ill errian txinpartak

 alkarri keñuka.

 Bidasoa'ren ura.

 betiko leloa

 Biriatu'rentzako,

 dauka eratua;

 gabaz eta egunez

 ari da kantari,

 iñoiz aspertu gabe,

 erri maitiari.