Urtchoari galde
Salaberry, E.
Urtcho pollita, norat ihes zoaz erne?
Nahi zintuzket, othoi, bildu esku-barne;
Zeta urdinez bezti, hegaldako aise,
Zeru arinez arin zira aldiz gorde...
Lepho-ondoa khechu dabilazu mokhor:
Iguzkiari hurbil ibilirik gogor,
Su-pindarrak lumetan dir-dir ditutzu hor:
Zure odol borthitzek ezin eman amor...
Banukela zuretzat, nahi dautzut erran,
Ogi-bihi zahitu, jinak gure landan:
Arthoa larri baita chorrotch den mokoan,
Zatho ogi biltzerat, ene ahurrean.
Bainan urtchoak, - basa -, itzuli du begi,
Ichkilima huts bezain miko eta hori;
ez inuchtuz zuhaitz-kontailerat jauzi...
Nehorek, lore ilhun, handik ezin higi.
Bertchoa hain duk maite jakin-zak, gizona,
Hire arima, urtcho, delakotz berdina:
Zerutik Jaun Goikoak lurrerat emana,
Zerurat itzultzea, borthitz haren lana!