Izparringia eskuan daukat
-1-
Izparringia eskuan daukat;
idazlaria Iñaki,
Tolosa'koa, Linazasoro,
«Altzeta'n» seme obeki.
Aldariaga'n zer gertatu dan
adieraziz ederki,
ta «Tximela'ri» euskeratuaz
bertsoak zaizkio jalki,
neska batek an zer egin duan
jakingo dezute aurki.
-2-
Maria Lourdes Agirreaurreta,
bigarrena Lasa dezu,
bederatzi urte baña biotza
ogeikoana daukazu.
Aldariaga zure etxean
ikusirik barrua su,
etzera asko konturatutzen
arrixkuan ziñala zu,
zure bearra ba-zan errian
goraltzeko Astiasu.
-3-
Etxea erretzen ez nun ikusi,
onela daukat entzuna,
gaiztakerizko lana etzala;
berezkoa erre zuna.
Une artantxe jaio zitzaizun
ama baten ontasuna,
baldin eduki ezpazenduan
dadukazun maitasuna,
an erreko zan, munduan jaio
beste kulparik etzuna.
-4-
Anai gaztenak bi illabete;
seaskan zegon lo ta lo,
zu bakarrikan etxe-kontuan
txoria baño esnago.
Amatxo, aita ta senideak,
belarra biltzen arago...
ta bat batera esan zenduan:
etxea erretzen dago!
aurtxoan billa nola jun ziñan
guziz arriturik nago.
-5-
Zure guraso jatorrak ari
geienez egingo zuten,
jungo al ziran semean billa
zu jun ziñan bezin zuzen?
Itxumen artan ezta erreza
anka ankari ematen,
xamurrago da pasata gero
gertatu dana esaten,
zuk bezelako anaitasuna
gaur gutxik dute izaten.
-6-
Zeure bizia arrixkaturik
suaren ingurutxuan,
larritasuna zer dan gazterik
ikusi dezu enetxuan.
Nik aginduko banu «Plus Ultra'n»
zuretzat itxu-itxuan,
diru mordo bat zeure izenean
Donosti'ko eltxetxuan,
gero gañera medalla ipiñi
pozikan zure petxuan.
-7-
Askok uste du nexka bizkorrak
diradela kalekuak,
ai, nik eztitut emen ikusten
maite, zu bezelakuak.
Ondo dakite guraso onak
eta sendi artekuak,
zuri begira boteaz daude
begietatik malkuak,
mundu onetan amon biurtu
zaitzala gure Jainkuak!
-8-
Au da negarra ta ezin poztua
ordu batek dakarrena,
zutik zegoan etxe maitea
auts biurtu zaizu dena.
Norbaitek penik artutzen badu
neroni nazu aurrena;
salbatzearren baitere poza,
sendiko izar ederrena,
geroztik amak kolkoan dauka
gozaturikan barrena.
-9-
Bei, txekor, idi, olloak aztu,
oroiturikan anaia,
garra tartean ikusirikan
zure bizian amaia.
Ederki erakutsi diguzu
zertaño dan alkar-naia,
ta nik limosna eskatutzen det,
orain dalako garaia,
eskua zabaldutzen badegu
berrituko da Aldaia.
-10-
Arretxe'n dezu kontratista ta
Tolosa'n arkitektua,
Laskibar jauna buru dalarik
Otegi da egitekua.
Erri guzia auzo-lanean;
laguntza egitazkua,
apaizak eta buruzagiak
egiten dute naikua,
ta neri berriz ixuritzen zait
bukaerakin malkua.