Eiz-leku ona dala dakigu
Errezola, Luix
-1-
Eiz-leku ona dala dakigu
Aduna'ko Elbarrena,
ogei eiztari kontatu ditut
juntaturik alkarrena.
Mibit kantua, artean illun,
entzun genduan aurrena,
luma urrea balitz bezela
tiroak berriz urrena.
-2-
Lau egabera buru gañean,
lurreraturik aulena,
saio ederra egiña dute
zein iritxiko aurrena.
Il zutela uste, baña zauritu,
egiten zuan errena,
orrelakotan az-ostrua du
gorde-leku ederrena.
-3-
Pizti gaxoen paraderoa
eztegu geroztik jakin,
bakoitzak biña tiro eginda
gero erritan alkarrekin.
Ez gera beintzat gu gizenduko
oiek botatakoekin,
amaika miru mantendutzen da
eiztarien eizarekin.
-4-
Sororik soro ortxe dabiltza,
belaz eta baratzetan,
artean ondo esnatu gabe
eizarekin ametsetan.
Ezer ikusten eztutenean
ate-zai ibai ertzetan,
kalte-besterik eztute egiten
oiek lur aberatsetan.
-5-
Ixkilludunak gauz bat ona du;
eztu bildutzen tiruak,
Polbora etxera ajolik gabe
egiten ditu jiruak.
Elurrak lurra naiz zuriz jantzi,
nunai ba-dira tiruak,
nik etxe-alde naigo ditut
pasa olako giruak.
-6-
Tapakik bota zilipurdika,
ipar aizea artzera,
«Naparranean» kopak artuta
eguardiz utsik etxera.
Beren maiteak «mar-mar» batean:
ortako joaten al zera?
Obea dezu bide ortatik
lenbait'len egin atzera.
-7-
Zerbait esaten kantuz ari naiz,
aspaldi ikasi nun oñez,
neu eiztaria izandua naiz
orregatik dakit orrez.
Elbarrituta jetxi zan arek
ondo zekian latiñez,
ta, zuek berriz, gizon bizkorrak,
nuntsu gorde zan jakiñ ez.
-8-
Orain ogei bat urte mugatsu,
ikusi nere artia,
belaz putzutan parritzen nuan
«reklamotako» atia.
Zenbat etorri, ainbeste jetxi,
tirua beti merkia,
lurrik batere ondatu gabe
amaika ba-det botia!
-9-
Bein eiztari bat sartu zitzaidan
meta atzean nengoala,
makurtu zan da, bertan tiroka
ekin zion bereala.
Ni albotikan algaraz lertzen,
esanaz «nerea dala»,
ikusi arte etzun sinistu
ura egurrezkoa zala.
-10-
Orain eztago ordun bezela
iñolaz ibiltzerikan,
eizikan ezta ugaritu ta
eiztaria gogotikan.
Au esan gabe ezin naiz egon
ezkenean ixilikan,
urte onenak arrapatuta
bizi naizela pozikan.
