Izar ederra zara eüskara
Peillen, Txomin
Izar ederra zara eüskara
bena odeiak nagusi
kanpok'aldetik joiten gütüan
aize zaharrek nahasi
zohardirik ez dakigüla
nola dezakegün kausi.
Sü eder batez berotüko da
hoztürik den Iparralte,
jar eüskaldünak girenak oro
bizi berri baten alte,
Eüskal Herrian hilaldiaren
ez dadin izan gure mente.
Bilo xuriak ezin heltüan
lanean ari beikirade
züek aldika bilo beltz horik
sailean sartüko zirade,
halaxe denek garbi dezagün
gure zerüko kerade.
(Egin eta abestu ez zituenak)
Bedexagar-i entzünik deitzot
berset berriak eskertzen
orain aldika ahal bezala
Urdiñabarra (y) aipatzen
Agosti Xahoz hasi beitzaikü
pastoralak ezkribatzen
hala kontatüz Atarraztarra
zoiñen eüskaldün izan zen.
Hebentik zonbait metrotan
harri xurian agertzen
Xahoren bürü arrenküratü
ilherritik da behatzen:
Ez dü ikusi beharrik ere
eüskara Züberoan galtzen
hainbeste maite züan mintzaje
xeharra ari lehertzen.
Eüskaldün axolgabeak üsü
beren etxetik baztertzen
eta erdaldün maltzürrek aldiz
non nahitikan zapaltzen
hur zikin hontan erdi itoak
nola eüskarak hatsartzen?
bürüa zütik etxekiz baizik
ezin da biziarazten.
Odei ondotik ateria beita
gogoaren pausagarri
erran dadila goresmenetan
mente hunen oroitgarri
ekaitzartean itsasuntzia
osorik zaigula jalgi
gure borroken arraunkatzeaz
eüskara bai dela bizi.