Urteak ainbetsu gaitz

Albizu, Guillermo

 -1-

 Urteak ainbetsu gaitz

 banaiz ikusia,

 ondo-ezaren berri

 nago ikasia.

 Ez edukiagatik

 nai detan guzia.

 Jainkoari eskerrak

 badaukat bizia.

 -2-

 Gaixoen egoeraz

 kupi naiz gogotik,

 baiñan ez gaude iñor

 libre danik ortik.

 Usterik gutxinean

 guk ez naiagatik,

 agintari ixilla

 jartzen da gaiñetik.

 -3-

 Noiz etorriko danik

 eztu abixatzen

 zenbait alditan oso

 zailla da uxatzen.

 Bere almena aintzat

 eztuena artzen,

 alik eta azkarren

 beera du bidaltzen.

 -4-

 Sudurrean gordeta

 dagon katarrua,

 zenbat eta luzego

 eta txarragua.

 Egun batzutan izan

 zan aize arrua,

 aretxek sartu ziran

 geiago barrua.

 -5-

 Illargia berritzez

 nuan otz ikaran,

 gora larriarekin

 gorputza dardaran.

 Buru ta belarriko

 miñaren bolaran,

 oiñazean astuna

 badakit nola dan!

 -6-

 Iñor eri eztizkat

 nik opa nereak,

 menturaz besten batek

 ez dauzka obeak.

 Erabakia dauka

 guztion jabeak,

 pasa bear ditula

 bakoitzak bereak.

 -7-

 Ikusirikan ondo

 lepoz goia argiz,

 plaketan ezarria

 didate bi aldiz.

 Osasuna danean

 konforme ez gabiltz,

 eta galtzen danean,

 billatuko balitz...?

 -8-

 Auxen esan ziraden

 miaturik astiz,

 ez nedilla ibilli

 otzak eta bustiz.

 Sendagille on, eta

 prestua da guztiz,

 garbitu diradena

 neukan «SINUSITIS».

 -9-

 Don Jabier Etxarri,

 Larraun'goa bera,

 ezpañetan eztitsu

 dabillki euskera.

 Etortzen zaizkan asko

 osasun eskera,

 sendatuta bidaltzen

 badaki etxera.

 -10-

 Senti danean batek

 eldu zaion gaitza,

 kentzeko alegiñak

 azkar egin bitza.

 Ondo pentsatzen bada

 gaixoan bizitza,

 batetik luzea da,

 bestetikan motza.

 -11-

 Batean au dalako,

 ta, bestean ura,

 geienean badegu

 zerbait errenkura.

 Garaiean artzen ez

 bazaio ardura,

 berak eramango du

 eriotz ordura.

 -12-

 Gizon, andre ta ume,

 mutill da neskatxa,

 xoxikan ez duena

 bezela aberatsa.

 Argia illundu ta,

 ixilltzean otsa,

 gorputza, zerraldoan

 betiko illotza.