Izazpi'ri erantzuna

Albizu, Gillermo

 Bertso batzuek agertu dira

 izenpetuak «Izazpi'k»,

 lagun zar batek kantatu dizkit,

 gero beste amazazpik.

 Apaiz orretxek lengo askoren

 tankera aundirik ez dik,

 Jainkoa eta aurren aitzekin

 andereñoan atzetik.

 Gaur zenbat buru, ainbat aburu,

 edo nai bada iritzi,

 olako aukera datorrenean

 esan gabe ezin utzi.

 Mudantza aundiak espero dira

 emen biar edo etzi,

 gu konpontzera bigarren aldiz

 Jainkoak bearko jetxi.

 Eguzki bero, illargi otza

 izar dizdiratzailliak,

 ta gauden lur au, orain artean

 mudantz gabe ibilliak.

 Santson bezela gu indartuko

 baldin bagiñu illiak,

 gure mende egon bearko luke

 guzti oien Egilliak.

 Apaiz jaun batek' bete nai badu

 abogaduan utsuna,

 argi ta garbi eman bear du

 egitazko erantzuna.

 Ta andereñoak ba-daki ondo,

 ezpada oso zuntzuna,

 Erlijioan oiñarritua

 dagola gizatasuna.

 Ez det pentsatzen Euskalerrian

 andereñorik badanik,

 emen daukagun erlijioa

 nola dan ez dakianik.

 Guraso eta gotzai buruak

 aur ezitzea emanik,

 ume txikiei erakusteko

 ez ote dute almenik?

 Erlijioa erakusteko

 or dagoala eliza,

 sinismen biziz Jesus'i deika,

 gora jasorik kaliza.

 Dana gezurra dala esanaz

 asitzen bada apaiza,

 beste mundura joan baiño len

 merezi luke paliza.

 Ez dakit nungo ordena duten

 lengo jazkerak kentzeko,

 batzuk oraindik badarabilte,

 ez dira danak artzeko.

 Sermoi ta kantun gogorik ezta,

 gutxigo errezatzeko,

 nunbait bildurra dute erorita

 elizak azpin artzeko.

 Azer morroiak dauden makutsik

 oitura zarrei eusteko,

 fedea galdu ote dute ola

 Kristo'n esanak uzteko?

 Gaur errez data, pestarik pesta

 dabiltz batekoik besteko,

 zeiñen dotriña ote daukate

 besteri erakusteko?

 Danok dakigu udan loreak

 bearrezko dula intza,

 gizonak berdin animarentzat

 Jaungoiko santuan itza.

 Beroien esku artu dutenak

 aur ezieran egintza,

 txiki diranei pixkabanaka

 egin ditezela mintza.

 Oso joera bildurgarriak

 ba-ditu demoniñuak,

 bolara ontan apaiz askori

 jartzen dizkien laiñuak...

 Zeiñek neurtu mingain batekin

 egin lezazken daiñuak,

 aurtxo maitean kupira izan

 zazute, andereñuak.

 Ikastolen zai egondu giñan

 oso denbora luzean,

 eta azkenik iritzi ziran

 Elizaren babesean.

 Bestela etzegon idekitzerik

 orrela izan ezean,

 berriz ekaitza ba-datorkigu

 arrotu zaigun aizean.

 Esaera auxe aspaldikoa

 «Euskaldun bezin fededun»,

 erakusten du gutar bakoitzak

 nolakoa izan bear dun.

 Euskalerriko kondaira ortan

 ondo ikasi baigendun,

 bere Jaungoiko bakarrarengan

 zer sinismena izan dun.

 Berdin pentsatzen duten pertsonak

 munduan bi ez dauzkatzu,

 baiña zuk ala nai bazenduke

 lagun bat emen naukazu.

 «Izazpi» apaiz bertsolaria,

 arren aditu zaidazu,

 geitxo esanda utsegin badet

 barkatu bear didazu.