Gipuzku ontan goientsuneko

Albizu, Gillermo

 1

 Gipuzku ontan goientsuneko

 erri bateko alaba,

 Bere izenik ziur ez dakit

 Urkizu edo Aldaba.

 Gain orietan aingerutxoak

 sortzeko toki al da ba?

 Emen, kalean, argien bidez

 egun biurtzen da gaba,

 Baña illunik ez da nabaitzen

 ori iñoiz jeixten bada.

 2

 Ibiltegiak alaitzen dira

 ori etorri orduko,

 Alako zeru usai eder bar

 ekarritzen dualako.

 Arrosak berak inbiri duten

 modukoa zeralako.

 Gai daudenak zu ikusitzean

 txoratutzen diralako...

 Danen biotzak pozez jartzeko

 bakarrik ba-zera naiko.

 3

 Biotzak poztu, begiz alaitu,

 txoriak ere kantari,

 Oietzaz kanpo esan ditezke

 ez dakit zenbat mirari.

 Zuaitzak beren jantzi-ostoak

 nai dizkitzute ixuri,

 Alaz guziaz beren azpian

 ezpailuke nai exeri,

 Par-irri egiñaz olaxe dabill

 guztien maite miñari.

 4

 Ama Birjiñan antz berekoa,

 aingeruzko ibilia,

 Ezer gutxikin apaiñ errexa,

 amets ezti iturria.

 Mundua zer biurtutzera

 zera onuntz etorria,

 Uste ez dezun makintxo batek

 erreparoa jarria...

 Trixtura danak kentzen dituzun

 kutuntxo maitegarria.

 5

 Gaurko oiturako kurkullarekin

 buruko illez jantzia,

 Gaztain kolore arre, argia,

 arrunt alkarri josia.

 Ain dizdiratsu dauzkatzun begik

 ikusten duten guzia,

 Berenganatzen dute eztiro

 mutillaren lei gosia,

 Ta zuk zeñentzat zauden oraindik

 erabaki ezin guzia.

 6

 Aste osoan goitako aize

 garbia artu ondoren,

 Igandietan jetxitzen zera

 pixka bat jolastearren.

 Lagun maitenak bixitatzera

 joaten zerade zu aurren,

 Guzientzako ain gogozkoa

 zu nolatan baizeraden,

 Alde egoten ez dizute uzten

 ai, zedorrek nai baño len.

 7

 Kaleak beian trankill utzita

 kea juaten dan eran,

 Basoak zear, gorantza zoaz

 "uso turitxo bat egan".

 Balitz bezela igo ezinda;

 gu pentsatzen berriz zugan,

 Uste gabean miru gaiztoak

 agertzen diran tankeran,

 Bide oietan eiztariren bat

 azalduko ez ote dan.

 8

 Mingañez eziñ leike esan garbi

 zenbat gaituzen poztutzen,

 Unerik txikienean ere

 zutaz ez gera aztutzen.

 Ain maitetasun beroa bada

 oso zailla da oztutzen;

 zeuk jakin gabe olaxe zabiltz

 danon biotzak ostutzen,

 Obe zenduke bat aukeratu

 asi baño len estutzen.

 9

 Aukeratzeak estutasunik

 oraindikan ez ematen,

 Gerta diteke gogoratzea

 itz auekin egun baten.

 Gazte zerala zalantzarekin

 baldin bazera egoten,

 Ez da errez gero, orain dauzkatzun

 komenentziak izaten,

 Au esaten da ez dakitenak

 nola dan jakin dezaten.

 10

 Askotxo aldiz ibilia naiz

 zu sortu ziñan kabira,

 Ingurutako tontorretatik

 ikusitzen dan begira.

 Esanaz: nere biotzan kargak

 pixkat ustuko balira,

 Bakarrik baño bien artean

 aixo eramaten dira,

 Or bizitzea zuk nai badezu

 gogoz joango naiz mendira.

 11

 Ai, gazte eder, biotz samur bat

 zerekin daramazune,

 Berriro esan bear dizut nik

 lendik ondo dakizuna.

 Nola zeraden ia burutik

 zoratua naukazuna;

 galdu baño len zentzua eta

 ondorean osasuna,

 Adierazi nai izan dizut

 dizudan maitetasuna.

 12

 Zeure guraso eta senidez

 bizi zeraden etxean,

 Baserri txuri, paketsu ortan

 menditxo baten ertzean.

 Otoitz beroak sarri egiñaz

 Kristau jatorren antzean,

 Izkuntz goretsi, apain onetan

 alkargana bildutzean,

 Txixtua irentsiz egon izan naiz

 zuen euskera aditzean.