Eskutitz atsegin bat

Albizu, Guillermo

 -1-

 Eskutitz atsegin bat

 det artu berria,

 bidali al baneza

 nere irudia.

 Bolara ontan nago

 erdi elbarria,

 jokatu gabetandik

 naiko loteria

 nere bizkar gañera

 ba-da eroria.

 -2-

 Egun batez nintzaden

 oso izerditu,

 akordatutzerako

 oztuta gelditu.

 Nik ibili egin nai,

 ta ezin mugitu,

 gizonak oso almen

 urriak baititu,

 neukan osasuna ara

 azkar erdibitu.

 -3-

 Arnasbide guziak

 zitzaizkidan itxi,

 zutik doi doia nintzan

 gelara iritxi.

 Eman didan jipoiak

 ederki enau utzi,

 gogorrenaizandare

 batek bear etsi,

 larri ibilita baña

 oraindik naiz bizi.

 -4-

 Iñork eztu ikusten

 bestek daukan miñik,

 ezta medikurikan

 ta ori dakiñik.

 Esanarren enien

 sinistu-azi nik,

 askoren oñazea

 zenbat dan jakiñik.

 askoren oñazea

 zenbat dan jakiñik.

 berritan elegoke

 sendatu ezinik.

 -5-

 Neri sendagai batzuk

 eman zizkidaten,

 baita saiatu ere

 aginduk egiten.

 Artzeko nagikeriz

 ni enaiz egoten,

 kontuz ibiliarren

 lanean da jaten,

 etorri bezin aixa

 gaitza ezta joaten.

 -6-

 Miatu nautenean

 «Raios Ekitzekin».

 sari ederra arkitu

 didate nerekin.

 Aurrenetik nola asi

 ezpaizuten jakin,

 au eztago kentzerik

 gatza ta urakin...

 oiean egon bear

 daukaten pleurakin!

 -7-

 Soñu beldurgarriak

 dauzkat saiatsian,

 kutxa minberatzen zait

 arnasa artzian.

 Indiziua sarri

 dator orratzián,

 mojatxuak dabiltza

 erlien antzian,

 jartzeko toki billa

 nere gorputzian.

 -8-

 Bururik ezin jaso,

 ankak berriz narrats,

 etengabeko antsiz

 egun eta arrats.

 Oñazez dagoana

 beti dago garratz,

 sartu baño lenago

 orrenbeste orratz

 kasik bukatu obe

 luke batek, orratx!

 -9-

 Arnasik ezin artu,

 barrendikan miña,

 morkotsakin bezela

 zulatua gaña.

 Olako egoera

 ezta atsegiña,

 neretzat gurutze au

 astuna da baña,

 pazientziz eraman

 nai det alegiña.

 -10-

 Guzion Ama zeran

 Birjiña Maria,

 maitasunezko itxaso

 ondorik gabia.

 Semia dezu zeru-

 lurreko jabia,

 eskeñitzen dizutet

 nere naigabia,

 luzatu gabe goruntz

 nai nuke abia.

 -11-

 Ezur eta mamizko

 degun soin ergela,

 iñoiz iruditzen da

 zerbait ba-gerala.

 Izkutatu bearra

 degu bereala,

 eze dagon ostoa

 laister da orbela,

 gure bizia ere

 dijoa orrela.

 -12-

 Usterik gutxiñean

 ba-dator ozkia,

 kaltegarri zait otza,

 berdin eguzkia.

 Jankaia aragi erre

 eta barazkia,

 ontan pasako balitz

 daukaten gaizkia,

 aterako det nola

 nagon argazkia.