"Atxeangatik" noa
Albizu, Guillermo
-1-
«Atxeangatik» noa
izketan astera,
ortatik etorri bai
gindezke nastera.
Garaiz kontuak ondo
ditzagun atera
eta bildu gaitezen
guziok batera,
nere iritziz «H» au
guretzat kalte da.
-2-
Zertan jarri esaten
extegun izkirik?
neroni etzait beintzat
gustatzen izpirik.
Izkuntza onek ba-du
berez itz eztirik,
marrazkiz kutsututzen
ez galdu astirik,
Gipuzkoa'n geurea
daukazun bizirik!
-3-
Arrazoi aundiakin
lengo idazlarik,
eztituzte on artzen
gaurko berrikerik.
Zarpailkeri oiekin
dana lardasturik
itzik osoenari
«atxea» sarturik,
uskeriak jartzen du
oso itxusturik.
-4-
Iñorreri eztiot
aditu izan nik
euskeraz «atxe» orrek
zer esan nai dunik.
Ainbeste jarraikera
izkuntzan egonik,
auzoko osakai billa
eztago zer junik,
berez danak edertzen
bai al dauka lanik?
-5-
Mintzaturik idazten
eztakin batekin
artxek emango digu
nai ainbat ikaskin.
Berea besterikan
nola ezpitakin,
«atxe» bearrik eztu
dabizkin itzekin,
mingañez du euskera
ta ez biatzekin.
-6-
Euskaldun berrientzat
gaurko idazkeraz
degun jardun-bidia
eztago aberats.
Arkitutzen diote
makiñabat akats,
guk berriz beroieri
dabilten euskeraz...
lendabizi izketan
ikastagun, beraz.
-7-
Mitxeleta urbiltzen dan
antzera argira
arazo ariñetan
murgiltzen bagera;
Egoak erretzean
abiadaz beera
beste izkuntzetara
jartzeaz begira,
euskeran kalte danak
etorriko dira.
-8-
Kendu bear giñuzke
idaz-lan narratsak,
leguntasunik eztu
beñere garratzak.
Gozo ta dotoriak,
eta aberatsak,
lore asko daukazki
gure euskal baratzak,
oiek billa ditzagun
utzirik arrotzak.
-9-
Gogoa duanantzat
ba-da nork giatu,
iztegi berrietan
dituzte pillatu.
Ikasi nai duenak
lezake miatu
arretarekin errez
litezke billatu,
euskerik garbiñean
biegu saiatu.
-10-
Arren, gure eztanari
alde bat utzita,
naspildu nai dutenei
ateak itxita.
Euskera maite dunak
bera ikasita;
dioguna bakarrik
jarriz idatzita,
laister bear dun malla
litzake iritxita.
-11-
Nunbait batzuk euskera
daukate berritzat,
nik au jarriko nuke
guztien arritzat.
Aurren aserakua
dala baiteritzat,
Jaungoikoak Adan'i
emana guretzat
beste argibiderik
eztaukagu beintzat.
-12-
Bere egilleakin
gizona oroitzean,
zenbat doai ezarri
zizkan biotzean.
Eskertu nai badu-re
egun da arratsean,
egin lezake aixe
euskera utsean
denborarik alperrik
galdu-be «atxean».
-13-
Edozein aldetako
gorri edo zuri,
euskaldunok euskeraz
bear degu ari.
Al dunak geio ikasi;
ondo dago ori,
mintzaera guztiak,
jakin al baledi
orbanik ezarri-be
garbi dagonari.
-14-
Oraindikan euskera
dago gordiñian,
nunai agertutzen da
sasoi bikañian.
Iraun lezake lengo
oitura apañian;
eraskiñen bearrik
eztauka soñian,
edertasunez ba-da
edozein añian.
-15-
Nik auxen eskatuko
nieke daneri,
euskeraz idazkirik
jarri nai danari.
Uzteko mingañantzat
alperrik danari
ta jarrai dezaiola
gogotsu lanari,
aintza eman zaiogun
guztien Jaunari
|