Maita dezagun

Kasal Otegi, Felipe

 Izkuntz guria maita dezagun

 Bear bezela biyotzez,

 Ezdegu bada ibilli bear

 Itz egiteko guk lotsez;

 Eta arkitu ezdediñ ama

 Guregatikan negarrez,

 Ipin dezagun apaindurikan

 Aritz ederren adarrez.

 Euskara eder maitiagatik

 Egingo det alegiña,

 Naiz nere luma eziñ alchatu

 Nik nai nezakien diña;

 Esaten det nik biyotzetikan

 Naizela euskaldun fiña,

 Nere odola galdu naigodet

 Ez utzi euskera-griña.

 Maita dezagun gure izkuntza

 Euskaldunak geradenak,

 Maita dezagun anai maitiak

 Biyotz prestua degunak;

 Aurrera bada galdu ezdediñ

 Itzegin dezagun danak,

 Beso zabalik artuko gaitu

 Bere biyotzera amak.

 Mintsu ote dan iduritzen zait

 Amacho gure Euskera,

 Gaitza sartuba daukagulako

 Euskal-erri abetara;

 Sartu zitzaigun ondo geundenak

 Guztiyak gaizki jartzera,

 Eta ginduzen libertadeak

 Geyenak lurperatzera.

 ¿Non dira gure aita bisabak?

 ¿Otegaituzte ikusten

 Zeru zabala eder ortatik

 Nola geraden gertatzen?

 Etsayen kontra ibilli ziran

 Beren odola isurtzen

 Lengo lege on ginduzen ayek

 Guri eskuetaratzen.

 Bai! egin zuten alegin dana

 Gizagajuak gugatik,

 Beste ainbeste ¿otegenduke

 Egingo guk ayengatik?

 Oju egiñaz esan dezagun

 ¡Bai! biyotzaren erditik,

 Ayen odolaren kutsurikan

 Ezdala galdu oraindik.