[Bertsotan]
Aire, Mixel (Xalbador [II])
1
Zer gai dorpea etorria den
nunbaitik nere aldera
Esperantzarik ez izanez dut
bihotza arras minbera
Bertze batzu're izan ditazke
naski nere arabera
Maitasunaren bidetik noa
ni behar ez den legera
Zuk ni ez ba nauzu maite ere
utz nezazu maitatzera
2
Zertako sartu ote naiz hola
maitasunaren saretan
Satan ote zen ihiztaria
ta hark bildu ni saretan
O Jainko huna, ezar nezazu
berriz zuk bide hobetan
Fedea badut malte ditudan
behar diren guzietan
Norbaiten gatik ez du bertze bat
ezarri nahi penetan.
3
Eguna etzaut argiegia
eta gaua zaut iluna
Ai, nola ote zabiltza nitan
zu, oraintxe, maitasuna
Ez bada untsa gordetzen, urrun
doa zure oihartzuna
Eta nik orai Norbaiti egin
Otoitza balitz entzuna
Behar ez den bat maitatu sari
ez dut izan nai lizuna.