Haizpeko maitekariak
Etxano
1
Ez naun mainontzi ez gaztanbera
jaio nindunan buruz aurrera
zer pena dudan jakin nahi badun
hator nirekin haizpera.
Ez ditun grina sorginak
ez ditun ez maite-minak
hoik mintzat ere ez dizkinat
baina hitza hain hutsa izanik
nola eman aditzera
zer diren penak jotzen dutenak
arnasaren funtsa bera.
2
Tximista batek jo nindinan behin
suge zitalak maiz ziztatu nin
zezenak adar otsoak hagin
apoak golko bete higuin.
Negarrez maite ahal hintzen
hoiek ez ninate mintzen
baizik saminak arintzen
gizatzarra dun bihotza ehotzen
eta diona ematen min
hirindun-ahala malkoz oratuz
taupaka hor segitzen din.
3
Kaleak bete zango mugikor
dozenan zazpi ostiko doilor
bistaz antzeko baitira usnaz
igarri behar nor den nor.
Larrua dinate fina
barrua zornez egina
zornetik erne arima
ez eska nadin etzan hirekin
izuak ez nazan agor
hire sabelak hoielako bat.
pentsatuz lezakela sor.
4
Bata legegin bia banka-jaun
mundua erdi-bana dazagun
hoien andreen maitasuna dun
nola golko bete ziraun.
Gizona gizonen mailu
beste zer jorik ez bailu
hori bai dela mingailu
ikusten ez den zernahi sinesten
fedea errezena dun
egun eta gau dakusagun hau
ezin sinestsiz hilko naun.
5
Kalerik kale anitz haur talde
hiria janzten alderik alde
ez dinat uste mundua hainbeste
maiteko nuken hoik gabe.
Hain xarmagarri ttikitan
baina sarri ene baitan
zer ikara sortzen zaitan
biharko giza-jaleak azal
guri hoietan baitaude
ez otoi gaurko munstro hoik atzo
haurrak ziren niri galde.
6
Hodeiek ihes tantaiak dardar
trumoiak goitik jo din deihadar
multzoka gautzan hiritzar honek
noiznahi dezakela su har.
Biolentziaren mende
lur abere eta jende
menderik mende bagaude
hortarako utzi ahal genizkinan
zuhaitz buztan eta abar
ez en negar errekak bihar
ur haina odol badakar.
7
Hala piztien nola gizonen
gorputz-arimek bost zentzu omen
bat falta dun hor aurrena bera
deitzen zaiona nazkamen.
Ikusiz batera oka
eginik besteak bota
bagenitza hoien kontra
ez lituzken ez hain lasai beren
larrutzarretan egonen
nigatik bertan leher bitez denak
errementatu ondoren.
8
Garia ehotzen duen errotak
berdin arantze minezko otak
zer erru dinat haitzak behera
zauritzen banau korrontak.
Sentimendua dudaino
indartsuago ni baino
hala behar hiltzeraino
berriro egin nazan amari
ezin eskatu zionat
txarrago luken sortu banindu
zerri hoietariko bat.
9
Haizkora sartzen zaion haritzak
kolpeko ezpal bat galtzen din behintzat
hala nire hitzak mihi zati bat
zarrasten zidan bakoitzak.
Harri arrain nahiz abere
maite dinat hala fede
heriotza bera ere
baina gizona deritzan hori
jo behar etsai nausitzat
horrek ez bahau mintzen esaidan
zeintzuk diren beste gaitzak.
10
Azaldu natzain barrenez barren
gorde esanok golkoan arren
hara eguzkiak goizero zenbat
adore berri dakarren.
Dela odol naiz izerdi
munduak badin alderdi
ederrik bederen erdi
milaka aldiz ninteken berriz
jaio eta hil pozarren
hi bezalako hainbestetatik
bakar bat maitatzearren.