Biba Eskualdunak
Azkaindarra
Jaz bereganatu du Jainkoak Zalduby,
Guzien arabera urthe bat goizegi:
Hark kantatuko zien suyet hau handizki...
Othoi kanta dezadan Herria nik ongi
Gogora detzadala zenbeit pertsu berri!! (bis)
1
Bozkaria gaitezen egun Eskualdunak:
Ichil detzagun denek gure auhen-minak...
Nigarretan ginauden Eskualdun omenak
Hurbil othe zituen hiltzeko egunak...
Gu hiltzea,... ez, ez du nahi Jainko Jaunak!
2
Eskualdunen zaintzeko eman du Gernikan
Hait gazte balios bat zaharrarenpean,
Handik atheraturik landatu Frantzian:
Segur gauza hoberik ez ditake izan
Elgar maitharazteko guzier Herrian!!!
3
Milesker, bai milesker, Espaņol anaiak
Pagamendurik ez du zuen dohain onak;
Ama baten umeak girade guziak...
Hori erraiten dauku arbola gaztiak!!!
Beraz bat dagozila zazpi Probintziak!
4
Eskualdunek munduan ez dugu parerik
Hortakotz ez ginuke deus behar kanpotik
Egun elgarretarat zazpiak bildurik
Har dezagun chedea, zer nahiren gatik,
Nihoiz ez jasaiteko Herrian kaskoinik!!!!
5
Kaskoinak etzaizkigu gu ontzeko heldu
Uste gabean nahi gintuzkete galdu,
Mintzaira eskualduna Eskualduner khendu...
Eskuara galduz geroz gureak egin du:
Bainan zaintzeko denek bat eginen dugu!!!
6
Denek egiten dugu juramentu egun
Sorthu bezala hilen garela Eskualdun...
Eskualduna, hastetik izan da fededun;
Gure fedea ere beraz zain dezagun,
Hola gure omena heda dadin urrun!!!
7
Hi, Uztaritzen hagon Eskualdun arbola,
Hoa, hoa handituz zeruetan gora...
Bethi Jainko maiteak hezala begira
Bai, hi haiz iguzkia, hi ere itzala:
Eskualduna Naiz eta Eskualdun hagola!!!
8
Ni, haur dohakabea, gazte nauk oraino
Bainan sofritzen diat halere frango,
Aspaldi hemen bainauk sor-lekhutik kampo...
Desterruan plazerik ez duk bizitzeko...
Egizak itzul nadin Herrirat lastercheko!!!
9
Haitza, gorphutzez urrun, bihotzez hirekin
Bizia eman niok plazer handirekin
Hire begiratzeko behar balitz egin...
Agur bat igortzen haut pertsu haukiekin...
Oi, kantatzera horrat nahiko nikek jin!!! (bis)