Ameriketatik
Echegaray, Karmelo
Chori kabi-gabea
¡Bai dala ibai! tristea!
¡Bai dala mingarriya!
¡Dala negargarriya!...
Urrun sort-erritikan
Lagun gabetanikan
¿Ene biyotza, nola,
Nola daite konsola?
Nere jayot-echea,
Zelai lorez betea,
Zugazti gereizduna,
Mendiska belarduna,
¿Non dira gaur, non dira?...
¿Nora nago begira?...
Ene biyotza, nola,
Nola daite konsola?
¡Zer gozotasunean
Bizi nitzan echean!
Emen gaur tristerikan,
Eta ¡zeiñ bakarrikan!
Penaz inguraturik,
Atsekabez urturik,
¿Ene biyotza, nola,
Nola daite konsola?
Malkozko iturriyak
Dira nere begiyak,
Eta nere malkoak
Sua beziñ beroak.
Dago nere barrua
Minduraz ornitua;
¿Ene biyotza, nola,
Nola daite konsola?
Onera etortzea
Zala Zeruratzea,
Oso sinistu nuen:
Amerika jo nuen.
¿Zer arki det?... gosea,
Bizi miñez betea:
¿Ene biyotza, nola,
Nola daite konsola?
¡Ai nere mendiyetan!
¡Ai nere bazterretan
Baneuka chabolchoa,
Nere kabichuloa!
Ez dedan bitartean,
Urrun nagoenean,
¿Ene biyotza, nola,
Nola daite konsola?
Billa beza urrea,
Danak diruzalea:
Neretzat naiyago det,
Askoz maiteago det,
Gozotasun laztana,
¡Gaur ¡ai! ez daukadana!
¿Ene biyotza, nola,
Nola daite konsola?
Istingak iturrira,
Iturriyak ibaira,
Ibaiyak itsasora,
Ni sort-orri gozora
Noa... gogoarekin,
¡T' eziñ gorputzarekin!
¿Ene biyotza, nola,
Nola daite konsola?
|